Audi e-tron GT

Í hnotskurn:

Audi e-tron GT quattro er lágur og straumlínulagaður lúxussportbíll með fjórhjóladrifi, náskyldur Porsche Taycan, hannaður fyrir þá sem setja akstur, afl og áberandi hönnun ofar notagildi.

Hann er aflmeiri og sneggri en flestir á svipuðu verði, hleður fremur hratt og lágur þyngdarpunktur gerir hann stöðugan og skemmtilegan í akstri. Auk skottsins er 85 l framskott undir vélarhlífinni.

Gallarnir eru að hann er meðal þeirra sem drífa styst í þessum verðflokki, skottið er eitt það minnsta og hann má ekki draga kerru. Porsche Taycan 4 Plus kostar nánast það sama en drífur mun lengra, fyrir þá sem vilja sams konar sportbíl sem hentar betur í langferðir.

e-tron GT er draumabíll fyrir þá sem leita að hreinni akstursánægju og sætta sig við takmarkaða drægni og lítið pláss.