Leapmotor B03X

Í hnotskurn:

Leapmotor B03X Pro er lítill fimm sæta fólksbíll sem er sérsniðinn fyrir innanbæjarakstur, skutl og dagleg erindi. Hann hentar einkum þeim sem leita að nýjum og einföldum rafbíl á sem hagstæðustu verði.

Helsti kostur bílsins er einmitt verðmiðinn, enda er hann með allra ódýrustu rafbílunum á landinu og býður upp á einstaklega lágt verð á hvern kílómetra drægni. Þá er hann óvenju snöggur miðað við aðra í sínum verðflokki, sem kemur sér vel þegar smeygja þarf bílnum inn í þétta umferð.

Helsti gallinn er að hann drífur mjög stutt og hleður fremur hægt. Drægnin dregst saman í íslenskum vetrarkulda og dugar því vart til að fara ótrauður á milli landshluta. Ef stefnan er tekin út á þjóðvegina kemur B03X ProMax útfærslan sterklega til greina, en hún býður upp á 90 km meiri drægni og um 25% styttri hleðslustopp fyrir 600.000 kr. meira. Eins færðu MG MG4 Urban Standard Range á 100.000 kr. lægra verði með 33 km meiri drægni, þótt hann hlaði hægar.

Fyrir þá sem vilja hagkvæman og lipran bæjarbíl sem kostar lítið í rekstri og innkaupum er B03X Pro engu að síður einkar fýsilegur kostur.