Volkswagen ID.3 Neo

Í hnotskurn:

Volkswagen ID.3 er fimm sæta hlaðbakur sem hefur skipað sér sess sem lipur og þægilegur bíll í daglegan akstur. Hann hentar sérstaklega vel þeim sem vilja nettan fólksbíl sem auðvelt er að leggja og athafna sig á í þéttbýli, án þess að fórna góðum aksturseiginleikum.

Í sínum verðflokki drífur hann lengra en flestir keppinautar. Drægnin dugar vel á milli landshluta og ætti að skila vel yfir 350 kílómetrum í vetrarkulda. Hann hleður jafnframt hraðar en gengur og gerist, sem styttir viðkomur á hleðslustöðvum á ferðalögum um landið.

Afturhjóladrifið veitir þó minna öryggi í hálku en framhjóladrif keppinautanna, auk þess sem hann er aflminni og hægari en flestir þeirra. Ef hámarksdrægni fyrir peninginn vegur þyngst er Kia EV3 Long Range til að mynda 200.000 kr. ódýrari og býður upp á 111 km meiri drægni.

ID.3 stendur engu að síður vel fyrir sínu sem liðugur og traustur bíll, einkum fyrir þá sem meta þýska akstursánægju og vilja staldra stutt við á hraðhleðslustöðvum.